Шведска министерка дојде во Скопје и прво јадеше симит погача, па отиде на средби со премиерот и министрите

За време на нејзината официјална посета на Македонија, шведската министерка за Европска Унија, Џесика Росенкранц, го започна денот со локален специјалитет пред средбите со македонските владини претставници.

На фејсбук-страницата на шведската амбасада беше објавено дека министерката уживала во „симит погача“, која шеговито ја опишаа како „солено лепче во лепче“, еден од типичните скопски пекарски производи.

„Каде најдобро да се вкуси овој оброк, ако не во срцето на главниот град – со поглед кон Камениот Мост, тврдината Кале, Старата Чаршија, црквата Свети Димитрија, Мустафа Пашина џамија и Даут Пашин Амам. Сè во една слика што совршено ја прикажува богатата скопска мултикултурна традиција и живото општество во Северна Македонија“, напишаа од амбасадата.

По појадокот и предвидените средби, Росенкранц и амбасадата ја истакнаа поддршката на Шведска за европските интеграции на Македонија и политиката на проширување на Европската Унија.