Шукова потврди: Договорот за изградба на „Чебрен“ не е потпишан, инвеститорот се жали
Министерката за животна средина, Каја Шујкова, вечерва во емисијата „Топ тема“ на Телма потврди дека инвеститорот со кој треба да се потпише договор за изградба, односно концесија за проектот „Чебрен“ се жали на условите.
Таа додаде дека договорот затоа се уште не е потпишан, но и дека нема што да се крие од јавноста, бидејќи, како што вели, постапката не е завршена.
Рече дека до крајот на годината ќе има конкретни информации дали ќе продолжи проектот. Рокот за потпишување на договорот е продолжен поради жалбената постапка од страна на грчката компанија „Архидрон“, а банкарската гаранција истекува на 31 декември.
– Заради жалбената постапка, рокот се продолжи некаде до средината на јануари, банкарската гаранција на компанијата е до 31 декември. Очекуваме одговор од нивна страна, рече Шукова.
Министерката додаде дека ако не се продолжи банкарската гаранција, понудата претстанува да важи.
– Документи никогаш не криеме, секогаш сме транспарентни. Во текот на постапката не можеме да ги споделуваме документите. Откако ќе заврши постапката, апсолутно се ќе биде споделено со јавноста. Немаме што да криеме, изјави Шукова.
