Што купуваме? На македонска граница запленети 20.000 фалсификати од 57 „брендови“
Царинската управа на Македонија бележи значителен напредок во борбата против фалсификуваната стока – само во првите пет месеци од годинава запленети се 49.638 парчиња фалсификати, што е повеќе од двојно во споредба со истиот период лани.
Во запленетата стока има над 6.000 парфеми, 5.000 пара обувки, 5.000 парчиња облека, како и други производи со ознаки на 57 познати заштитени трговски марки. Досега во 20.000 од запленетите артикли е потврдено дека се работи за фалсификати, додека останатите се предмет на натамошна проверка.
Царинските службеници откриле 51 случај на повреда на правото од интелектуална сопственост, од кои 19 случаи се веќе потврдени како обид за внес на лажна стока на домашниот пазар.
„Еден од главните приоритети е ефикасна борба против фалсификатите преку зајакнати контроли и соработка со носителите на правата,“ изјави директорот на Царината, Бобан Николовски. Тој истакна дека веќе се регистрирани 75 случаи на заплени, наспроти 29 случаи во истиот период минатата година.
Успехот на Царинската управа беше препознаен и од глобалната организација РЕАКТ Балкан, која додели благодарници на секторите за контрола, истраги и акцизи за нивниот придонес во спречување на трговијата со фалсификати.
На средба со менаџерот на РЕАКТ Балкан, Катерина Хаџистојанова, било разговарано за унапредување на процедурите за потврда на оригиналноста на стоката и за побрзо уништување на фалсификуваните производи.
Застапниците на трговските марки истакнале дека институциите прават видлив напредок, што е потврдено и со официјалните бројки и резултати на терен.
