Шилегов тврди дека раководството го довело СДСМ до најниската партиска поддршка и бара оставка
Поранешниот градоначалник на Скопје и истакнат член на СДСМ, Петре Шилегов, најави дека ќе побара оставка од актуелното партиско раководство, обвинувајќи го за драматичен пад на поддршката и за, како што кажа, катастрофални резултати од работењето.
„Да ја сведете поддршката на партијата на само стотина илјади гласови и 15 пратеници, да станете петта партија во Скопје и трета во Македонија – ако тоа не е катастрофа, тогаш што е?“, рече Шилегов во емисијата „Топ Тема“ на Телма.
Тој најави дека во партијата ќе се појават барања за промена, не само од негова страна, туку и од поширока група незадоволни функционери и пратеници кои, како што посочи, немаат комуникација со раководството. „Кога ќе излезат дел од пратениците, можеби половина пратеничка група, кога дел од општинските организации ќе ги затворат вратите – тогаш ќе сфатите дека мора да си заминете“, порача Шилегов.
Во настапот, тој се наврати и на неговото искуство во партијата, потсетувајќи дека бил отстранет од потпретседателската функција во операцијата „Метла“, а потоа не бил свикан конгресот кој бил побаран веднаш по локалните избори. Сега, пак, го оспорува легитимитетот на претстојниот конгрес поради „апатија, пасивизација и изолација“ во партијата и недостиг од материјали за делегатите.
„Не беше одржан отчетен конгрес по поразот на изборите во 2021. По парламентарните избори 2024 пропадна конгресот, а сега се свикува нов на кој делегатите немаат ниту заклучоци ниту предлог политички одлуки“, рече Шилегов, појаснувајќи дека според статутот општинските организации треба да ги разгледаат материјалите и да дадат мислење, што не се случило.
Според Шилегов, партијата го изгубила својот социјалдемократски идентитет и членовите не можат да се идентификуваат со актуелната политика и одлуки. Тој ја критикува и одлуката на лидерот Венко Филипче СДСМ да не учествува на лидерската средба, оценувајќи дека тоа не било став донесен од партиските тела.
Шилегов посочи и дека нема формална партиска одлука да не се поддржи проектот „Безбеден град“, иако, според него, Филипче јавно го презентирал ставот дека системот може да се употреби против опозицијата. „Тоа не е позиција на партијата, туку лично гледање на Филипче“, рече тој.
Во однос на изборните перспективи, Шилегов изрази уверување дека СДСМ може да го порази ВМРО–ДПМНЕ на евентуални вонредни избори, ако дојде до брза консолидација. „Поразително е да има мнозинско опозициско расположение во земјата, а СДСМ да се натпреварува со ДУИ и Левица за второ или трето место“, рече тој.
Тој ги отфрли обвинувањата дека „одработува за ВМРО–ДПМНЕ“ или дека „станал вмровец“, оценувајќи ги како лични дискредитации поради недостаток од аргументи. „Ќе измислуваат секакви приказни, дека сум пиел или дека сум работел за вмровски фирми – тоа е резултат на немање одговор“, додаде Шилегов, очекувајќи нови напади по неговото гостување.
