Шест месеци по бегството, на Фејсбук се огласи Артан Груби

Поранешниот вицепремиер Артан Груби, кој веќе шест месеци е недостапен за македонските институции, денеска се огласи на својот профил на Фејсбук по повод својот роденден.

Груби си сподели роденденски честитки од негови блиски пријатели и роднини.

Се работи за прва негова активност по исчезнувањето, а објавата не содржи никаква информација за тоа каде се наоѓа или кога ќе се врати.

Груби на 15 декември 2024 година замина во, како што тогаш рече, „приватна посета“, но неговото отсуство подоцна доби карактер на бегство по што од страна на Министерството за внатрешни работи е ставен на „меѓународна потерница“.

Обвинителството досега не објави дали има сомненија за неговата точна локација. Според неофицијални информации, постои сомневање дека Груби се крие во Албанија, а за неговата безбедност и престој наводно се грижи познат албански бизнисмен близок до политички кругови.

Последната порака што Груби ја објави на денот на заминувањето беше апел да не биде „клеветен“, со образложение дека „ќе се врати штом ги заврши приватните обврски“. Но, половина година подоцна, тоа сè уште не се случило.