ШЕФОТ НА „РАЈНЕР“ НА ПРАГОТ НА НАЈГОЛЕМИОТ БОНУС ВО ИСТОРИЈАТА – еве колку ќе инкасира Мајкл О'Лири
Шефот на авиокомпанијата Ryanair, Мајкл О’Лири се приближува до потенцијален бонус од 100 милиони евра, кој би бил меѓу најголемите во историјата на европските компании, пренесува Investor.
Причината е што акциите на превозникот достигнаа рекордни височини.
Цената на акцијата на Ryanair се искачи на 18,99 евра на крајот од минатата недела, со што О’Лири се приближи до прагот што може да предизвика огромна исплата.
Акциите на компанијата мора или да достигнат 21 евро и да останат на тоа ниво 28 дена, или компанијата мора да пријави годишна добивка по оданочување од 2,2 милијарди евра за О’Лири да го наплати бонусот, кој е договорен во 2019 година. Доколку акциите го достигнат критичното ниво, О’Лири би добил опции за акции, право да купува акции по намалена цена, според Фајненшл тајмс.
О’Лири би можел да купи 10 милиони акции по 11,12 евра, што значи дека би можел да купи акции во вредност од 210 милиони евра за 111,2 милиони евра, со што веднаш ќе оствари профит од 98,8 милиони евра.
Зголемувањето на цената на акцијата потребна за да се добие бонусот би значело дека вредноста на воздухопловната компанија со седиште во главниот град на Ирска, Даблин, е повеќе од двојно зголемена од август 2019 година, со што вредноста на компанијата на пазарот на капитал е зголемена на речиси 24 милијарди евра. Рајанер е веќе втора највредна авиокомпанија во светот по капитализација на акциите, зад американскиот авиопревозник Delta Air Lines.
Ја презеде компанијата во 1994 година.
О’Лири, кој го презеде Ryanair уште во 1994 година, го предводеше метеорскиот пораст на компанијата до титулата најголема европска авиокомпанија. За тоа време тој веќе се стекна со 3,9 отсто од акциите во компанијата, вреден 907 милиони евра. Идниот бонус е резултат на шемата за поттикнување договорена во 2019 година, која првично требаше да истече во 2024 година, но беше продолжена до 2028 година во декември минатата година. Тогаш цената на акцијата на Ryanair беше под 13 евра.
Финансиските аналитичари кои го следат работењето на компанијата предвидуваат просечна цена од 24 евра по акција во следните 12 месеци, според податоците на Блумберг, кои лесно би го ставиле О’Лири над прагот за наплата на бонуси.
Извор: Бонитет.ком
Фото: ЕПА
