Се бара итно решение за црната точка на новиот експресен пат Градско-Дреново каде загинаа петмина за два месеца
Само два месеца по пуштањето во употреба, исклучувањето од новоизградениот експресен пат Градско-Дреново стана црна точка, каде животите ги загубија пет лица, а едно дете беше тешко повредено. Причина – остар свиок, недоволна сообраќајна сигнализација и висока брзина.
Последната трагедија се случи пред два дена, кога две лица од Делчево излетаа од патот токму на критичниот дел кај исклучокот. Пред тоа, истиот дел веќе однесе три животи.
Жителите на населбата Стопанство, која се наоѓа непосредно до проблематичниот свиок на влезот кон автопатот за Скопје, алармираат дека бројот на несреќи е уште поголем од пријавеното. Тие сведочат дека возила често завршуваат во нивните дворови и додаваат дека уште за време на изградбата предупредувале на опасноста, но нивните барања биле игнорирани.
Од Јавното претпријатие за државни патишта велат дека ситуацијата е сериозна и веќе се преземаат итни мерки.
„Пред 20 дена дадовме налог за ново сообраќајно решение со кое ќе бидат поставени дополнителни знаци што ќе ги предупредуваат возачите да ја намалат брзината“, изјави директорот на ЈПДП, Коце Трајановски за Сакам да кажам. Тој посочи дека новиот проект е веќе подготвен, но сега се чека одобрување од Министерството за транспорт и врски за да започне имплементацијата.
Трајановски нагласи дека станува збор за проект наследен од претходното раководство и одобрен од сите релевантни институции, а интервенции што отстапуваат од него би можеле да значат кривична одговорност.
„За зголемување на безбедноста, во моментов можеме да поставиме само повеќе сообраќајни знаци. Но, размислуваме и за нов, поголем градежен зафат – со изградба на мостови кај исклучувањето. Веќе сме во консултации со експерти и професори за да се изнајде соодветно решение“, додаде Трајановски.
Експресниот пат Градско-Дреново беше отворен на 30 јуни оваа година, по изградба која траеше од 2016. Вкупната инвестиција изнесуваше 44,7 милиони евра, обезбедени преку заем од Европската банка за обнова и развој (ЕБОР).
