Руски авион со шест лица се урна во североисточниот дел на Авганистан
Руски авион се урна во планинскиот североисточен Авганистан, објави во неделата агенцијата за воздушен транспорт Росавијација. Се верува дека во авионот имало шест лица.
Според руското издание Комерсант, четворица од патниците се живи, со различни повреди. Состојбата на другите двајца се утврдува.
„Според прелиминарните информации, во авионот имало шест лица: четворица членови на екипажот и двајца патници. Бизнис авионот со два мотори, произведен од француската компанија „Дасо“ во 1978 година, во сопственост на компанија „Атлетик груп“ и приватно лице, превезувал болен патник од Индија до Узбекистан и Русија.
Операцијата за пребарување на авионот продолжува, уверуваат од агенцијата. Според руската новинска агенција РИА Новости, двајцата патници се Руси. Едната била тешко болна, а другата бил нејзиниот сопруг кој го платил летот.
Претходно, претставник на локалните власти изјави за АФП дека авионот паднал во провинцијата Бадакшан, која граничи со Кина, Таџикистан и Пакистан. „Авионот се урна, но локацијата сè уште не е позната. Испративме тимови, но тие сè уште не пристигнаа“, рече Забихулах Амири, шеф на покраинскиот информативен оддел.
„Утрото бевме информирани од локалното население. Местото на несреќата е осум часа оддалечено од главниот град на провинцијата Фајзабад, рече Амири. Руските истражители најавија дека започнуваат истрага за причините за несреќата. Моќниот планински венец Хинду Куш ја преминува провинцијата, дом на највисокиот врв во Авганистан, планината Ношак на 7.492 метри.
фото: архива
