Русија ја престигна Саудиска Арабија во испораките на нафта за Кина

На почетокот на годината Русија стана лидер во испораките на нафта во Кина, која увезува гориво со големи попусти, пишува „Ројтерс“ повикувајќи се на податоци на Генералната управа на царината на Кина.

Испораките на руска нафта во првите два месеци од оваа година изнесуваат 15,68 милиони тони, околу 1,94 милиони барели дневно. Ова е речиси четвртина (23,8 отсто) повеќе од показателот во истиот период лани (1,57 милиони барели дневно), пишува „Политика.рс“.

Приватните кинески рафинерии за нафта во провинцијата Шандонг имаа корист од пониските цени. Во јануари руската нафта ESPO, која беше испорачана во февруари, беше купена со попуст од осум долари во однос на цените од лондонската берза за нафта ICE Brent. Дополнително, увозот на нафта од Малезија е зголемен за 144,2 отсто во однос на минатата година и достигна 0,65 милиони барели дневно.

Претходно, лидер во извозот на нафта во Кина беше Саудиска Арабија. Минатата година на Кина и продаде 87,49 милиони тони, што е 1,75 милиони барели дневно. Во периодот јануари-февруари 2023 година испорача 13,92 милиони тони (1,72 милиони барели дневно), додека една година претходно испорача 1,81 милиони барели дневно.

Според проценките на аналитичарите на агенцијата Блумберг, оваа година Кина би можела да го зголеми увозот на руска нафта за 500.000 барели, околу 2,2 милиони барели дневно или дури 2,5 милиони барели, доколку се зголемат испораките на нафта од брендот Урал. Како што појасни агенцијата, на крајот на февруари нагло се зголемил бројот на танкери во руските пристаништа во Тихиот Океан кои превезуваат нафта, а во средината на февруари 34 танкери веќе превезувале гориво, пренесува Спутник.