Ристовска и Ристова меѓу кандидатите за судија во Стразбур – 21 пријава на конкурсот распишан од МНР

Обвинителката Ленче Ристовска и судијката на Кривичниот суд, Оља Ристова, се меѓу 21-те кандидати пријавени на конкурсот за нов судија од Северна Македонија во Европскиот суд за човекови права во Стразбур, објави ТВ Телма.

Конкурсот го распиша Министерството за надворешни работи и надворешна трговија, а освен судии и обвинители, аплицирале и познати адвокати. И Ристовска и Ристова го потврдиле учеството во трката за оваа престижна функција, чиј мандат трае девет години.

Од МНР информираат дека селекцијата ќе ја врши меѓуресорска комисија формирана од Владата, која по разгледување и интервјуа ќе изготви рангирана листа и ќе предложи тројца кандидати до Советодавниот панел на експерти при Советот на Европа.

„Процесот ќе биде транспарентен и објективен, согласно утврдените критериуми“, велат од МНР.

Сегашниот судија од Северна Македонија во Европскиот суд е Јован Илиевски, кој ја извршува функцијата од 2017 година. Неговиот наследник треба да ја преземе должноста во 2026 година.