Ристески: Владината мерка за маржите ја поевтини храната за 3 отсто
Заменик-министерот за економија Марјан Ристески тврди дека двете владини мерки за ограничување на маржата на основните прехранбени производи, чиј рок истекува на 30 април, го дале потребниот ефект и ги намалиле трошоците кај граѓаните.
– Пред сѐ, имавме дефлација во март во однос на февруари за 1,3 проценти, а имаше и намалување на трошоците за храна и пијалаци од околу 3 проценти во март во однос на февруари. Крајните резултати ќе ги имаме по завршување на мерката, по крајот на април. Со официјалните податоци од Државниот завод за статистика ќе знаеме точно колку оваа мерка дала заштеда за македонското семејство во однос на трошоците за основните прехранбени продукти. Од тие податоци и од однесувањето на трговците ќе зависи какви и дали ќе има други мерки во иднина, изјави Ристески.при посетата на ТИРЗ Прилеп, а како одговор на новинарско прашање.
Заменик-министерот брифираше дека Државниот пазарен инспекторат при контролата на спроведувањето на овие мерки изрекол казнени налози од преку 3 милиона денари досега.
– Во овој период се направени преку 600 инспекциски контроли во трговијата на мало и на големо. Беа затворени осум објекти, претежно беа увозници на овошје и на зеленчук кои се обидоа да ја изиграат мерката. Контролите ќе траат до крајот на спроведувањето на мерката, до 30 април. Онаму каде ќе бидат утврдени неправилности, ќе бидат санкционирани со казни, а казните се од 500 до 10.000 евра, а и можност за затворање на одредени објекти до 15 дена, рече Ристески.
