Путин за тензиите во Русија: Организаторите на бунтот ќе одговараат за предавство на татковината
„Она што го гледаме е прободување нож во грбот на државата и народот“, рече рускиот претседател Владимир Путин во обраќањето до своите сонародници во саботата, пренесоа светските агенции.
Изјавата доаѓа по постапките на началникот на приватната армија „Вагнер“ Евгениј Пригожин. Тој го обвини Министерството за одбрана дека ги гранатирало неговите позиции и убило 2.000 борци на групата. Пригожин изјавил дека се одмаздува и ги повикал своите војници да маршираат кон Москва на „Марш за правда“. Според него, ова не бил воен удар.
Во своето обраќање до нацијата, Путин повика на единство во сите руски сили и надминување на разликите. Тој ги опиша постапките на Пригожин како „бунт и авантура“ и рече дека земјата ќе се брани од внатрешно предавство и вети остри казни за бунтовниците.
„Прекумерната амбиција доведе до предавство. Предавство и предавство! Да се предизвика секаков вид на метеж е смртоносна закана. Нашите постапки ќе бидат брутални. Секој кој свесно тргнал по патот на предавството и уцената и го подготвил вооружениот бунт, ќе ја претрпи својата неизбежна казна. Организаторите ќе одговараат за предавство на татковината“, рече шефот на државата.
Армијата и агенциите за спроведување на законот ги добија потребните наредби.
Ситуацијата во градот Ростов на Дон и понатаму е комплицирана. Работата на раководните тела е блокирана, но ќе се преземат активности за стабилизирање на ситуацијата, изјави и рускиот претседател.
