Путин пак се кандидира за претседател
Рускиот претседател Владимир Путин во петокот потврди дека ќе се кандидира за нов мандат на претседателските избори во 2024 година, пренесува руската државна новинска агенција ТАСС.
Путин на состанокот со учесниците на церемонијата на доделување воени награди во Кремљ во петокот рече дека ќе се кандидира за уште еден шестгодишен мандат.
Ова се случи еден ден откако руските пратеници објавија дека изборите ќе се одржат на 17 март 2024 година.
Претседателката на Централната изборна комисија Ела Памфилова изјави дека изборите ќе траат три дена – од 15 до 17 март.
Според неа, овој формат веќе станува традиционален за рускиот изборен систем.
Таа потсети дека за безбедност на граѓаните за прв пат е искористено тридневното гласање за време на пандемијата.
Соопштението следи по повеќемесечните шпекулации за тоа дали 71-годишникот, кој е на власт од 2000 година, планира да бара уште шест години на функцијата по уставните измени во 2020 година, му дозволуваат повторно да се кандидира.
Владимир Путин беше избран за претседател на Русија четири пати во 2000, 2004, 2012 и 2018 година.
