ПРВИТЕ БЕБИЊА ВО 2026 ВО ВЕЛЕС И КАВАДАРЦИ СЕ ЖЕНСКИ: Градоначалниците ги посетија новите жители
Првиот ден од Новата 2026 година донесе радост во породилиштата во Велес и Кавадарци, каде првите новороденчиња се девојчиња. Локалните власти веќе ги посетија мајките, посакувајќи им здравје и среќно детство на најмладите сограѓани.
Во велешката Општа болница, првото бебе се роди денеска во 11:51 часот. Се работи за женско бебе по име Мила, која е втора ќерка на 31-годишната Клементина Штерјовска.
Бебето е тешко 2,700 грама и долго 50 сантиметри, а породувањето е извршено со царски рез под контрола на д-р Ѓорѓиче Николов и главната сестра Бети Митковска.
Градоначалникот Марко Колев ја посети мајката и ѝ врачи пригодни подароци, како и штедна книшка со 15.000 денари.
Во Кавадарци, празничната ноќ беше особено радосна за мајката Ивона (родена 1997 година), која се породи спонтано само 28 минути по полноќ.
Првороденото женско бебе тежи 2.550 грама и е долго 51 сантиметар. Набргу по неа, во болницата се родило и машко бебе.
Градоначалникот Митко Јанчев при посетата истакна дека болницата ги има сите услови за квалитетна услуга и дека секогаш ќе ја ужива поддршката од Општината и бизнис секторот.
