„Провизиите за основните банкарски услуги се највисоки во регионот“

Партијата на пензионери изрази сериозна загриженост поради, како што вели, високите банкарски провизии и надоместоци за основни услуги, кои според нив се највисоки во регионот. Преку соопштение до медиумите, од партијата апелираат до Владата и Собранието итно да донесат законско решение со кое граѓаните ќе бидат ослободени од плаќање на такви трошоци.

– Апелираме за донесување закон што ќе овозможи пристап до основни банкарски услуги без провизии, особено за пензионерите и другите ранливи категории, се вели во соопштението.

Предлогот подразбира дека банките не би смееле да наплаќаат надоместоци за услуги како што се: подигање готовина на шалтер или банкомат, плаќање на сметки за комунални услуги и одржување на тековна сметка – доколку граѓанинот прима редовни месечни примања на истата сметка (пензија, плата, социјална помош и сл.).

Од партијата нагласуваат дека во некои земји од регионот веќе постојат вакви пракси, при што не се наплатуваат трошоци за отворање, затворање или одржување на основна платежна сметка.

– Целта е финансиска инклузија и поголема правична распределба на трошоците, особено во време на економски предизвици, стои во реакцијата.

Партијата најавува дека ќе продолжи да се залага за конкретни мерки што ќе ја подобрат финансиската положба на пензионерите и ранливите групи.