Протест во Блатец против изградба на хидроцентрала: Граѓаните бараат зачувување на водата и еколошка анализа
Младите од село Блатец, вклучени во иницијативата „За чисто Блатец“, денеска излегоа на протест против изградбата на хидроцентралата во нивната општина. Акцијата започна во 15 часот и се очекува да трае до 17 часот. Присутните извикуваа „УА ПРОФИТЕРИ“, изразувајќи незадоволство од досегашните активности поврзани со проектот.
Покрај редовните блокади и протестите, граѓаните подготвија и петиција во која ги изнесуваат своите барања. Тие инсистираат на стопирање на изградбата на хидроцентралата и на спроведување на независна и целосна еколошка и хидролошка студија. Исто така, побаруваат институциите да гарантираат заштита на водоснабдувањето, да ја почитуваат волјата на локалното население и да вложат во одржливи и еколошки прифатливи алтернативи за производство на енергија.
Според иницијативата, постои реална опасност од исчезнување на околу 40 селски чешми, кои се главен извор на вода за жителите на Блатец.
Иницијативата „За чисто Блатец“ нагласува дека со протестот сакаат да го привлечат вниманието на јавноста и институциите за потенцијалните штети врз животната средина и локалната заедница.
