Проширена истрагата за пожарот во дискотеката „Пулс“ – под истрага и сопственикот на објектот

Основното јавно обвинителство Кочани ја прошири истрагата за трагичниот пожар во дискотеката „Пулс“, кој однесе пет човечки животи, и отвори постапка против уште едно лице – сопственик на објектот каде со години функционирала дискотеката.

Новото осомничено лице се товари за соизвршителство на кривично дело „Тешки дела против општата сигурност“ по член 292 во врска со член 288 од Кривичниот законик. Обвинителството утврдило дека тој, без дозвола за пренамена на објектот, во договор со неформалниот сопственик на правното лице кое управувало со „Пулс“, вршел и учествувал во незаконски градежни интервенции од 2012 до март 2025 година.

Истрагата посочува дека објектот првично имал намена Г3 – сервиси и сообраќајна инфраструктура, но бил пренаменет во Б3 – големи угостителски единици без потребна документација, со што било овозможено незаконско вршење на угостителска дејност како дискотека или кабаре.

Обвинителството веќе достави предлог до судијата на претходна постапка за изрекување мерки на претпазливост за новоосомничениот.