Повторен протест на „Паркови и зеленило“ – без плати за септември и октомври, работниците најавуваат штрајк
Вработените во ЈП „Паркови и зеленило“ – Скопје повторно протестираа пред управната зграда на претпријатието поради тоа што сè уште не им се исплатени платите за септември и октомври.
Тие најавија дека ќе продолжат со протестите и утре, и ги повикаа сите колеги да се приклучат. Од синдикатот порачаа дека бараат само исплата на заостанатите плати и активирање на здравственото осигурување, бидејќи дел од работниците не можат да користат лекарска помош или да подигнат лекови на рецепт.
Синдикалните претставници информираа дека досега поднеле околу 150 барања за арбитража и неколку тужби до суд, бидејќи роковите за исплата се одамна пробиени. Велат дека добиле повеќе ветувања од раководството на претпријатието, но ниту едно не е исполнето.
Претпријатието, според информациите добиени од вработените, чека финансиски средства од Град Скопје и од ЈП „Водовод и канализација“ за да може да ги исплати платите.
Од синдикатот предупредуваат дека доколку состојбата не се реши, од петок „Паркови и зеленило“ ќе стапи во штрајк, а тоа може да предизвика проблеми со одржувањето на парковите и јавните површини во главниот град.
