Пациентите со рак без тумор-маркери, дел од анализите плаќаат од џеб – Онкологија повторно со недостиг на реагенси
Веќе неколку месеци на Клиниката за онкологија недостасуваат тумор-маркери, како и лековите „цисплатин“ и „таксол“, кои се користат во редовната терапија на онколошките пациенти.
Наместо таму, пациентите се праќаат во други лаборатории, како што е Клиничка биохемија, за да ги направат потребните крвни тестови.
Дел од нив велат дека за овие анализи биле принудени да платат, бидејќи во упатот не им била внесена соодветната шифра која обезбедува бесплатна услуга за онколошките болни.
Министерот за здравство Азир Алиу уверува дека со измена на законските прописи ќе се создаде системско решение за проблемите со недостиг на реагенси за тумор-маркери.
Здружението на пациенти „Хема Онко“ бара итна измена на законот за јавни набавки на лекови, со цел да се спречи повторување на состојбите со недостиг на терапија за пациентите со рак. Според здружението, сегашната регулатива овозможува пролонгирани тендерски постапки и административни застои кои создаваат празнини во снабдувањето со неопходните медикаменти.
Од здружението укажуваат дека проблемот може да се надмине само со промена на начинот на набавка и со обезбедување континуирано снабдување, наместо зависност од тендерски рокови и жалбени постапки.
Министерството за здравство најавува законски измени со кои ќе се овозможи нова, пофлексибилна постапка при јавните набавки за лекови и реагенси.
Со тоа би се избегнало времето на чекање меѓу две тендерски постапки, кое често доведува до недостиг на терапија и дијагностички материјали.
