Повредените од пожарот во Кочани со реакција: Си заминува докторката Катерина, не е исто кога некој само ја пополнува смената, и кога некој навистина се грижи!
Повредените лица од трагичниот пожар во ноќниот клуб „Пулс“ во Кочани испратија писмено обраќање до јавноста, изразувајќи длабока загриженост поради најавените кадровски промени во Општата болница со проширена дејност – Кочани, кои, според нив, сериозно ќе влијаат врз нивниот понатамошен третман и закрепнување, пишува Канал8 од Кочани.
„Чувствуваме должност и потреба да се обратиме јавно поради сериозна и загрижувачка промена во нашата здравствена нега. Од 1 јуни, докторката Катерина Паниќ – докторка Кате, која беше наш главен доктор и поддршка во целиот период на опоравување, повеќе нема да биде дел од болницата. Таа заминува во друга установа, а ние сѐ уште не знаеме кој ќе дојде на нејзино место и каков ќе биде понатамошниот пристап кон нашето лекување“, стои во реакцијата.
Пациентите кои се лекуваат во болницата велат дека заминувањето на докторката внесува страв и неизвесност во нивните животи, во време кога им е најпотребна стабилност и континуитет во здравствената грижа.
„Не знаеме што нè чека утре. Не знаеме кој ќе ја замени, ниту дали тој или таа ќе има истиот пристап. Не е исто кога некој само ја пополнува смената, и кога некој навистина се грижи. Докторката Кате не беше само лекар – таа беше наша надеж, наша сила. Начинот на кој пристапуваше со човечност и разбирање, не може да се замени. Во неа изградивме длабока доверба – доверба која е тешко стеклива во период на траума и болка“, велат повредените.
Докторката Катерина Паниќ Мирчовска, уште пред трагичниот настан, поднела барање за прекин на работниот однос поради ангажман во скопската болница „8 Септември“. Иако решението за нејзино прераспределување било потпишано од поранешниот министер Арбен Таравари, неговиот заменик Јовица Андовски ја запрел одлуката, дозволувајќи ѝ да остане во Кочани сѐ додека има потреба од нејзина грижа.
Сепак, по неколку месеци неизвесност, сега е потврдено дека таа заминува.
Апелот на повредените е јасен – бараат транспарентност, грижа и одговорност од здравствените власти.
„Не бараме чуда. Бараме грижа, разбирање и доследност. Бараме да не бидеме оставени сами во најтешките моменти.“, заклучуваат тие.
