Потврден притвор за директорот и управителот за Отпад во „Комунална Хигиена“
Кривичниот совет на Основниот кривичен суд Скопје ги одби жалбите и го потврди притворот од 30 дена за в.д. директорот Сабахадин Рустеми и управителот за отпад Аки Саити од ЈП „Комунална хигиена“ Скопје.
Одлуката е донесена по предлог на Обвинителството поради основано сомнение за сторено кривично дело „Загрозување на животната средина и природата со отпад“.
Обвинети се дека постапиле спротивно на Законот за управување со отпадот и обврските од Оперативната програма, што довело до создавање диви депонии на јавни и сообраќајни површини во Скопје.
Инспекциски надзори и експертски мислења потврдиле дека ваквото работење оштетило почва, воздух и вода, со што е создадена потенцијална опасност по здравјето на граѓаните. Притворот е определен поради опасност од влијание врз сведоци и можност за повторување на делото.
