Потрошени 8,5 милиони евра, а сè уште се издаваат изводи со машина за пишување
Повеќе од 520 милиони денари или 8,5 милиони евра се потрошени за дигитализација на матичните книги, но процесот сè уште не е завршен – покажува најновиот извештај на Државниот завод за ревизија. И покрај тоа што дигитализацијата започнала уште во 2014 година, а скенирањето во 2019, досега се скенирани само 52% од записите, а во електронскиот регистар се внесени 49%.
Ревизорите утврдиле отсуство на стратегија, контролни механизми и квалификуван кадар, што го забавува процесот и ги изложува личните податоци на граѓаните на злоупотреби. Дополнително, Управата за водење на матични книги нема обезбедено соодветни услови за чување на книгите – дел од нив се веќе оштетени и неупотребливи.
Во периодот од 2018 до 2024 година, биле склучени 288 договори за дело за внес на податоци, но мнозинството од ангажираните не ја извршувале предвидената работа. За нив се исплатени над 30 милиони денари.
Проблем е и недостигот на ИТ кадар – недостигаат над 55% од потребните вработени, а постојат и случаи на неовластени пристапи до системот во неработно време. Од 61 издаден сертификат за електронски потпис, речиси сите електронски изводи се потпишани од само тројца матичари од Скопје. Во руралните средини електронските услуги речиси не се користат.
Ревизорите посочуваат и дека во Скопје, каде има најголем број изводи, не се користи систем за реден број, поради што граѓаните чекаат во редици, што создава услови за корупција.
ДЗР препорачува итни мерки за финализирање на дигитализацијата, подобрување на безбедноста и унифицирање на услугите за сите граѓани.
