Построги правила за сезонско вработување во Хрватска – што се менува?
Од април 2025 година, сите агенции што се занимаваат со доведување странски работници во Хрватска, особено оние од регионот, мораат да се прилагодат на многу построга законска рамка. Новиот Закон за странци воведува низа промени насочени кон регулирање на секторот за привремено вработување, но и кон зајакнување на правата на странските работници во Хрватска, пишува biznis.rs.
Адвокатите од канцеларијата „Стојковиќ Адвокат“ велат дека вработувањето на странци повеќе нема да може да функционира според принципот – „донесете, распоредете и видете што ќе се случи следно“.
„Отсега, работната дозвола се издава исклучиво за одреден работодавач, а секоја промена на компанијата бара нов административен процес. Со други зборови, работниците повеќе нема да можат да „шетаат“ од работа до работа преку истата агенција – законот го забранува ова“, ги објаснуваат адвокатите новите прописи.
Особено значајна новина се однесува на споделената одговорност. Досега, компаниите и агенциите можеа да ја префрлат одговорноста една на друга во случај на неправилности. Сега тоа повеќе не е можно.
„Доколку се утврди дека условите за работа не се во согласност со законот – без разлика дали станува збор за неисплатени плати, лошо сместување или непочитување на работното време – и агенцијата и компанијата крајна корисничка ќе ги сносат последиците. Ќе се изрекуваат казни, но во посериозни случаи тие може да вклучуваат и забрана за понатамошно вработување на странци“, наведуваат адвокатите.
Посебен акцент се става на еднаквиот третман на странските работници. Без оглед на фактот дека се вработени привремено и преку агенции, тие сега мора да имаат исти права како и постојано вработените во домашните компании. Ова значи иста плата, исти услови за работа и сместување, како и право на одмор и слободни денови. Привремениот договор повеќе не е изговор за полош третман.
Новите правила бараат од агенциите да водат соодветна и ажурирана евиденција за сите свои вработени, но и да ги пријават кај надлежните институции. Во спротивно, тие ќе се соочат со строги санкции, вклучително и забрана за работа на територијата на Хрватска. Непријавен работник повеќе не значи само „технички дефект“, туку сериозно кршење на законот.
foto freepik.com
