Помалку од 500 пријавени на јавниот повик за пожарникари – Ангелов: Очекувавме повеќе кандидати

Јавниот повик за пријавување на лица кои ќе учествуваат во превенција и справување со пожари завршува денеска, но интересот не ги исполни очекувањата. Директорот на Дирекцијата за заштита и спасување, Стојанче Ангелов, на денешната прес-конференција изјави дека се пријавиле помалку од 500 кандидати низ целата држава, а во Скопје бројката е под 50, иако се очекувале 80 лица.

Во наредните денови, пријавените ќе бидат повикани во територијалните противпожарни единици, каде ќе следат најмалку дводневна обука, за време на која ќе се направи селекција на најподготвените.

„Најдобрите кандидати ќе имаат можност за вработување во локалните противпожарни единици или во Дирекцијата, а дел од нив и во Специјалната единица која ќе дејствува на тешко пристапни терени“, посочи Ангелов, додавајќи дека платите таму ќе бидат повисоки, но и ангажманот значително поинтензивен.

Целта на оваа единица е справување со најтешките и најсложените пожари, каде е неопходна физичка подготвеност и брза реакција.