Полициска акција за малверзации со стокови резерви: Приведени поранешни заменик-министер и директор, како и 3 раководители

Од раните утрински часови се спроведува обемна полициска акција на повеќе локации во Скопје, Тетово и Куманово, во координација со Основното јавно обвинителство – Скопје. Според првичните информации, меѓу приведените и осомничените се поранешен заменик-министер за земјоделство Трајан Димковски, поранешен директор на Агенцијата за стокови резерви, како и тројца раководители од истата институција.

Предмет на истрагата се сомнежи за сериозни малверзации со државните стокови резерви. Според Обвинителството, осомничените со своето неизвршување на службените обврски дозволиле да се отпишат 1.500.000 килограми меркантилна пченица и 500.000 килограми јачмен од резервите, нанесувајќи штета на државниот буџет од околу 780.000 евра.

Меѓу осомничените, покрај поранешниот заменик-министер Т.Д. и поранешниот директор Р.А., се и двајца раководители во институцијата, како и едно лиценцирано вешто лице од Бирото за процена, специјализирано за процени во земјоделството.

Полициските активности се уште траат, а дополнителни информации и детални податоци за акцијата се очекуваат во текот на денот.