Одбраната обвини: Доказите за „Пулс“ хаотични и сведоците од 283 драстично скратени на 25!
На денешното второ рочиште за трагичниот пожар во дискотеката „Пулс“, одбраната на дел од обвинетите остро ја критикуваше работата на Обвинителството, тврдејќи дека доказната документација е „целосно несредена и хаотична“.
Адвокатката Сузана Јошевска пред судијката истакна дека материјалите доставени во електронска форма биле превртени и технички нефункционални, односно не можеле да се ротираат.
Дополнително, документите не биле нумерирани ниту соодветно именувани, а единствено фолдерите имале називи – кои, според неа, биле неконзистентни.
Таа посочи конкретен пример каде исказ од сведок бил пронајден во папка означена како „градежна документација“.
Адвокатката на обвинетиот Михаил Јованов, пак, предложи девет нови сведоци. Таа ја надополни критиката кон доказниот материјал и посочи уште една сериозна забелешка: во првичната верзија на обвинението биле наведени 283 сведоци, додека во „пречистениот“ список бројот бил драстично намален – на само 25 лица.
Во продолжението на рочиштето се очекува обвинетите формално да се изјаснат за вината.
