Почна судењето за групата Беланоца-Барон: Обвинителството откри морничави детали
Со воведни зборови на Обвинителството, кои открија морничави детали за најмалку осум брутални убиства, денеска во судницата на затворот Идризово започна судењето против деветтемина водачи и членови на криминалната група позната како Беланоца-Барон. Одбраната, пак, уште на самиот почеток ја оспори законитоста на клучните докази, тврдејќи дека биле прибавени со незаконско следење во затворските ќелии.
Обвинети за повеќе убиства, изнуди и загрозување на општата сигурност во периодот од 2020 до 2024 година се Фатљум Ајети (Тоте), Акиф Равмановски (Јусуф Акифи–Барон), Зулќуфли Нуредини и уште шестмина други членови.
Верници преку ден, сурови убијци навечер
Во својот воведен говор, јавната обвинителка истакна дека доказната постапка ќе покаже како членовите на групата од една страна се декларирале како големи верници и муслимани, а од друга учествувале во ликвидации за пари, трговија со дрога, рекет и проституција.
„Има луѓе за кои животот значи сума на пари кои плаќаат преголема цена доколку убиството се изврши на најсуров начин, со испукување на цел арсенал автоматско оружје во лицето на противникот за цел негово уништување, а воедно и понижување и испраќање јасна порака“, рече обвинителката.
Таа додаде дека еден од обвинетите дури изразил желба да изврши самоубиствен напад и го учел својот син на тие постулати, додека групата немала лојалност кон никого и „денес убиваат заедно, а друг ден кројат планови за да се убиваат меѓусебно“.
Судир на одбраната и обвинителството за доказите
Адвокатот Еленко Миланов, бранител на првообвинетиот Фатљум Ајети, побара доказите прибавени со посебни истражни мерки да бидат прогласени за незаконски. Тој нагласи дека во обвинението не е наведена ниту една наредба за тајно следење и снимање надвор од дом или приватен деловен простор.
Обвинителката возврати дека „затворската ќелија недвосмислено претставува затворен и физички ограничен простор каде што се одвива приватна комуникација“. Според неа, посебната истражна мерка „следење во затворен простор“ била законска, оправдана како единствен начин за прибирање докази и одобрена од надлежен судија.
„Доказите прибрани преку оваа мерка се законски и допустливи имајќи го предвид јавниот интерес за откривање на вистината во овој случај кој е од исклучително значење за безбедноста на граѓаните“, посочи обвинителката.
