Почина Хилда Кондовска, една од пионерите на новинарството за култура во земјава
На 81 годишна возраст, почина Хилдегард – Хилда Кондовска, телевизиски новинар од првите генерации на МТВ. Својата долга и богата новинарска кариера ја започна есента 1962 година, по враќањето од Италија, каде ги посетуваше курсевите што во тоа време ги организираше RAI – Италијанската радио телевизија.
Кондовска беше новинар, коментатор и уредник на Редакцијата за култура и уметност на ТВ Дневникот на МТВ, каде што го мина најголемиот дел од работниот век. Во 1992 година, мина во Културната редакција на МТВ. Зад себе остави големо новинарско наследство, како уредник на серија емисии за македонските цркви и манастири, портрети на современи писатели, композитори, драмски, музички, балетски и ликовни уметници, а беше и автор на емисии од историјата на македонскиот театар, градот Скопје и други.
Кондовска работеше и за весниците Нова Македонија, Вечер, Културен Живот и други.
Погребот на Хилда Кондовска ќе се изврши утре на градските гробишта во Бутел, во кругот на семејството.
