Петковиќ за косовските специјалци: Што бараат со оружје, мапи, ГПС, длабоко во централна Србија и во шума?
Директорот на владината Канцеларија за Косово и Метохија, Петар Петковиќ, на вонредна прес-конференција изјави дека специјалците на косовскиот премиер Албин Курти биле длабоко на територијата на централна Србија.
Вели дека српската полиција не ја поминала административната линија ниту милиметар. Петковиќ кажа дека Србија е подготвена да ги понуди сите докази и повика да се отвори меѓународна истрага доколку е потребно, јави дописникот на МИА од Белград.
„Антитерористичката единица на српската жандармерија лоцираше и уапси тројца припадници на специјалната полиција на Курти кои беа вооружени до заби“, рече Петковиќ.
Тројцата имале автоматско оружје и целосна воена опрема со ГПС уреди, мапи и друга опрема.
„Тие што ги прекршија овие меѓународни договори се токму овие албански терористи, припадници на косовската полиција“, рече Петковиќ.
Тој ги негира тврдењата на косовските власти дека се работи за некакво киднапирање.
„Што бараат со оружје, мапи, ГПС, длабоко во централна Србија и во шума? Тоа ќе го утврди истрагата“, рече Петковиќ.
Курти го оквалификува како агресија и намера за дестабилизација на земјата денешното приведување на тројца припадници на полицијата на Косово, за кои властите и медиумите во Приштина тврдат дека биле киднапирани од маскирани припадници на српски сили на косовска територија, јави дописникот на МИА од Приштина.
Курти побара итно ослободување на косовските полицајци и ја повика меѓународната заедница да го осуди инцидентот.
