„Пет лица бевме на маса, само јас жив останав, славевме син на другар од детство, паднав под луѓе, се гушев од притисок – ме извлекоа во последен момент“, рече сведокот Китанов
Сведокот Мартин Китанов во своето сведоштво за пожарот во дискотеката „Пулс“ опиша драматични моменти на паника, стампедо и борба за преживување, откако огнот се проширил за време на настапот.
Тој изјави дека со пријател дошол во дискотеката за да го „испочитуваат другарот“, кој подоцна починал, по повод раѓањето на неговиот син. По пристигнувањето, нивниот пријател Ѓорѓи купил две влезници од шалтерот, по што влегле во објектот. Китанов посочи дека не знае кој ги продавал билетите.
Првите 10 до 15 минути ги поминале на маса лоцирана веднаш до бината, на крајот од шанкот. Китанов накратко излегол со намера да оди во тоалет, каде што имало гужва, а на вратата забележал присуство на полиција која вршела идентификација. Потоа се вратил назад на масата.
„Сè течеше нормално сè додека еден од пејачите не се јави на микрофон. Дотогаш не бевме свесни дека нешто се случува“, изјави Китанов. По активирањето на пиротехничките прскалки, за кратко време од бината било соопштено дека мора да се напушти објектот.
Кога се свртел кон излезот, Китанов видел оган и заедно со пријателот се упатил кон главната врата. „До каубојската врата стигнавме брзо, но веќе имаше линија од оган, чувствувавме силна топлина, очите печеа. Од тој момент движењето беше по сантиметар“, сведочеше тој.
По поминувањето на првата врата, повеќе лица почнале да паѓаат, меѓу кои и тој самиот. Китанов паднал напред, по што врз него паднале други луѓе. „Цел ред лежевме на подот. Никој не можеше да излезе“, изјави тој.
Прв кој се обидел да му помогне бил Лазар Захариев, но поради силниот притисок од толпата не успеал да го извлече и продолжил да спасува други. Китанов наведе дека не чувствувал чад, туку силно гушење од притисокот на телата врз него.
„Знаев дека сум во голема опасност. Единствено се обидував да издржам да дишам“, изјави тој. Двајца пожарникари се обиделе да го извлечат, но не успеале поради притисокот. Во моментите кога ја изгубил надежта, како што рече, помислил на своите две деца.
Потоа, како што сведочи, непознато момче му пришло и со голем напор успеало да го извлече. „Тоа го доживувам како божја сила“, изјави Китанов. Тој бил извлечен без патики и со соблечени фармерки.
Надвор, му помогнала девојка по име Ана, која го препознала и му помогнала да се облече, по што му дала вода и го смирувала. Китанов сакал да се врати назад за да ги бара пријателите, но присутните не му дозволиле, укажувајќи дека е повреден и цел во крв.
Откако седнал на тротоарот, доживеал силен стрес и вкочанетост на рацете и нозете. „Гледав пред мене сцени со луѓе и деца кои паѓаа и се онесвестуваа, а јас не можев да помогнам“, сведочеше тој.
Подоцна се упатил кон бензинска пумпа каде работел негов пријател, каде што колабирал и му била укажана прва помош. Подоцна бил префрлен во болница, каде, како што изјави, одбил да слушне информации за состојбата на своите пријатели, стравувајќи од лоши вести.
