Пендаровски: Не е потпишан договор за стратешко партнерство со Британија

Поранешниот претседател Стево Пендаровски тврди дека Македонија во моментов нема договор за стратешко партнерство со Обединетото Кралство, како што најавуваше актуелната влада, туку само меморандум за соработка.

„Во она што ни е дадено на увид и што беше ратификувано во средата попладне, нема ништо стратешко“, вели Пендаровски во интервју за Дојче Веле.

Тој посочува дека документот според својата содржина повеќе наликува на меморандум за соработка, па дури и на почетно писмо за намери, во кое двете влади набројуваат четири области за идни преговори и договори.

„Во суштина, тоа е само начелен договор за британско кредитирање на инфраструктурни проекти во Македонија кои допрва ќе бидат прецизирани од двете страни“, потенцира поранешниот шеф на државата.

Пендаровски додава дека британската страна навестила можност за нов договор во иднина, кој навистина би ги опфатил стратешките аспекти од билатералните односи меѓу Скопје и Лондон.

„Да сме живи и здрави, можеби еден ден тоа ќе го видиме, но ова што сега го имаме нема никаква врска со стратегија. Ова е договор да седнеме и да разговараме за тоа што ни треба за кредитирање“, заклучува Пендаровски.