Пелистер залутал во ЛШ – Алборг со пола сили го разнесе со 15 разлика

Данскиот гигант на Пелистер му покажа дека е залутан во ракометната елита, иако високи амбиции имаа битолчани, па денеска и со половина сили буквално го прегазија нашиот првак, кој имаше сила да им парира само во првите 18 минути од мечот. Сѐ потоа беше само меч во еден правец, со безброј грешки на Пелистер и рутински реализации на Данците.

Откако Цветан Кузмановски во 18-та минута израмни на 8-8, тоа беше сѐ од отпорот на битолчани, зашто Алборг до полувреме веќе ја обезбеди победата со серијата 10-2, за големи плус осум (18-10), а каде застанаа во серијата продолжија во првата половина од вториот дел.

Пелистер во тие 16 минути од вториот дел даде само четири гола, Алборг ги наполни со 11, па Данците дојдоа до најголемите плус 15 разлика на мечот (29-14) во тој момент, а во завршницата имаа и плус 16, за само рутински го доработеа мечот за да ја запишат победата со конечни плус 15 (38-23).

Алекс Влах даде седум гола, а Микел Хансен погоди петпати како најефикасни кај Алборг, додека Никлас Ландин собра осум интервенции. Кај Пелистер, Павле Петровиќ даде седум гола, а Домен Тајник погоди четирипати. Марко Кизиќ собра шест, а Урбан Лесјак пет интервенции.

За Пелистер ова е втор пораз откако загубија пред една недела од норвешки Колстад во Битола со девет разлика (22-31).