Пелистер загуби од ПСЖ, ама не разочара

Сепак, битолскиот тим ја оствари својата цел – скапо да ја продаде кожата и да го повтори изданието од дуелот против Кил на домашен терен. Го искористи лабавиот пристап на ПСЖ и долго време беше во игра дури и за изненадување на овој натпревар.

Со исклучок на почетните 2-0, Пелистер беше рамноправен до 23. минута, а на периоди се наоѓаше и во минимално водство. Во 24. минута, ПСЖ првпат поведе со три разлика (13-10), со колку што замина и на голем одмор (15-12).

И вториот дел не донесе големи промени во играта. ПСЖ не запнуваше многу, па Пелистер го користеше тоа за да се закани, како во 40. минута кога дојде на 19-20. Следуваше серија од 7-2 на „светците“ и највисоки 27-21 на десетина минути пред крајот на натпреварот. И тоа не го обесхрабри македонскиот првак кој се доближи на 26-29, но со два гола во финишот, преку Матхе и Холм, ПСЖ дојде до конечните 31-26.

Тајник и Борзаш го предводеа Пелистер со по пет гола, а голманот Лесјак оствари девет одбрани. Камил Шипрак од ПСЖ беше најефикасен на натпреварот со девет гола. Во следното коло, на 19 октомври, битолчани гостуваат кај Загреб.