Паника во Сан Диего: Се урна мал авион, опожарени 15 куќи
Мал авион се сруши рано утринава во населбата Марфи Кенион во Сан Диего, при што избувна пожар што зафати најмалку 15 домови, соопштија локалните власти. Несреќата се случила за време на густа магла, што дополнително ја отежнало ситуацијата.
Жителите од неколку блокови биле евакуирани поради опасноста од ширење на пожарот. На прес-конференција, заменик-шефот на Противпожарната служба, Дан Еди, изјави дека „има авионско гориво насекаде“ и дека приоритет на службите е брзо пребарување на погодените домови и евакуација на граѓаните.
„Има директен удар врз повеќе куќи“, додаде Еди, истакнувајќи ја сериозноста на инцидентот.
Во моментов не е познато дали има повредени лица, ниту кој се наоѓал во авионот. Според Федералната авијациска администрација, станува збор за авион од типот Cessna 550, кој има капацитет за шест до осум патници.
