ПАДНАЛА ФАСАДА, ИЗЛЕТАЛ ПОКРИВ ОД БАЗЕН: Бура ја зафати Црна Гора
Бура ја зафати Црна Гора. Силен ветер вчера и денеска дуваше во централните и крајбрежните делови на државата. Дрвја паднаа на коловозот, дел од фасада на зграда се урна на мостот во центарот на Подгорица, а покрив излета од базен во Котор.
Службата за заштита и спасување на Подгорица во изминатото деноноќие на терен имала 20-тина интервенции.
„Во текот на 24 часа на улица паднаа најмалку три дрвја, се беше отстрането со брза акција. Фасада падна во центарот на градот. За среќа насекаде е причинета само материјална штета и нема повредени поради силните ветрови и налети на ветер и можни ризични ситуации, апелираме граѓаните до среда да не излегуваат надвор, апелот особено важи за постарите лица“, вели за новинската агенција „РИНА“ Здравко Блечиќ, командир на Службата за заштита и спасување Подгорица.
На северот на Црна Гора вчера од снежните наноси беа извлечени 14 луѓе.
