Пациенти умирале оти им била давана несоодветна терапија на Клиниката за Онкологија во Скопје
Кај 29 пациенти се давале нови и скапи лекови спротивно на стручните онколошки упатства, со грешки во дозирањето и во фазата на болеста. Во дел од случаите, лекови се препишувале и раздолжувале со туѓи лозинки и факсимили, без валидна медицинска проценка. Кај повеќе пациенти биле дадени терапии и покрај тоа што се знаело дека нема да имаат ефект поради напредната состојба и телесната слабост.
Основното јавно обвинителство Скопје поднесе две обвиненија до Основниот кривичен суд за аферата „Онкологија“, во кои се опфатени вкупно шест лица – двајца поранешни директори на Клиниката за онкологија и радиотерапија и четворица лекари онколози. Обвиненијата се однесуваат и на економски криминал во вредност од над 45 милиони евра и на тешко нарушување на здравјето на пациенти преку несовесно лекување.
Првото обвинение се однесува на економското работење на Клиниката, каде што се теретат поранешниот медицински директор и организацискиот директор. Тие се обвинети за продолжени кривични дела – злоупотреба на службената положба и овластување, измама и проневера во службата. Според обвинителството, од 2018 до 2022 година, тие преку противзаконити јавни набавки и фиктивно раздолжување на лекови му нанеле штета на Буџетот на државата од над 2,2 милијарди денари, а прибавиле корист за добавувачи од дополнителни 430 милиони денари.
Меѓу најтешките обвинувања е и проневерата на лекови – со докази дека дел од терапијата не била дадена на пациентите, туку била фиктивно раздолжена. Кај девет пациенти се утврдени сериозни отстапувања, а медицинскиот директор, со помош на организацискиот, присвоил лекови во вредност од најмалку 13 милиони денари.
Второто обвинение се однесува на начинот на лекување на пациентите и вклучува четворица лекари онколози. Првиот обвинет, кој воедно е и поранешен директор, заедно со друга лекарка, се товари за продолжено кривично дело тешки дела против здравјето на луѓето, како и несовесно лекување болни. Другите двајца лекари се обвинети за истото дело, извршено како серија поврзани активности.
