„Овој случај мора да оди до крај, 63 млади животи се уништени“, вели мајка на жртва од Пулс

Марија Петрушова, мајка на една од жртвите од трагедијата во ноќниот клуб „Пулс“ во Кочани, денеска пред судницата во Идризово истакна дека родителите сè уште не чувствуваат дека правдата е исполнета. Таа со силни емоции зборуваше за последиците од пожарот, кои – како што вели – сè уште ги носат преживеаните, но и семејствата на загинатите.

„Во овој случај мора да се оди до крај. Мора да дојдеме, да видиме, да слушнеме. Не сметаме дека правдата е задоволена. Шеесет и три млади животи се уништени,“ рече Петрушова.

Таа потсети дека и денеска има преживеани кои се водат во болничките евиденции и страдаат од сериозни последици.

„Има повредени во многу тешка состојба, луѓе кои не смеат ни да се движат, ни на сонце да излезат. Сега се појавуваат и нови проблеми – од воздухот што го вдишувале, од чадот. Министерството за здравство мора да преземе нешто понатаму,“ нагласи Петрушова.

Таа потсети и на неодамнешната смрт на уште една жртва – пејачот Владимир Блажев, кој подолго време беше во болница поради последиците од пожарот.

„Срцето ми се кине. Не знам дали има уште жртви во критична состојба, се надевам дека нема. Ама не знам што да кажам…“ додаде таа, видливо потресена.

Петрушова заврши со порака дека родителите нема да се откажат од борбата за вистината и одговорноста:

„Ние сме тука поради љубовта кон нашите деца.“