ОВА СЕ КОМПАНИИТЕ ГУБИТНИЦИ: Каде најмногу „удрија“ царините на Трамп?

Трговската војна на претседателот Доналд Трамп ги чинеше компаниите повеќе од 34 милијарди долари загуба на продажба и зголемени трошоци, а се очекува таа сума да се зголеми бидејќи продолжената неизвесност околу царините го парализира донесувањето одлуки во некои од најголемите светски компании, јавија американски медиуми. Тие пренесоа анализа на Ројтерс во која с евели дека низ САД, Азија и Европа, големите компании, вклучувајќи ги Епл, Форд, Порше и Сони, ги повлекоа или ги намалија своите прогнози за профит. Огромното мнозинство велат дека непредвидливата природа на трговската политика на Трамп го оневозможила прецизното проценување на трошоците.

Според анализата загубата од 34 милијарди долари е збир на проценки за 32 компании од американскиот индекс S&P 500, три компании од европскиот STOXX 600 и 21 компанија од јапонскиот Nikkei 225, но економистите веруваат дека трошоците за бизнисите веројатно ќе бидат многу пати повисоки отколку што компаниите досега открија.

„Може да се удвои или дури и тројно, но загубите во секој случај ќе бидат многу поголеми отколку што повеќето луѓе сфаќаат“, рече професорот на Јеил, Џефри Соненфелд, кој предупреди дека последиците би можеле да бидат многу полоши, наведувајќи го потенцијалот за пониска потрошувачка и деловна потрошувачка и повисоки инфлаторни очекувања.

Иако неодамнешната пауза во кинеско-американската трговска војна и одложувањето на царините за Европската унија донесе одредено олеснување, се уште не е јасно како ќе изгледаат конечните трговски договори. Стратезите велат дека во оваа ситуација, компаниите ќе се обидат да ги зајакнат синџирите на снабдување и да дадат приоритет на новите пазари, но тоа ќе ги зголеми трошоците.

Поради многу неизвесности, компаниите не можат да бидат сигурни за конечните трошоци. Како што сезоната на корпоративни приходи се приближува кон крајот, во анализата се открива дека најмалку 42 компании ги намалиле своите прогнози, а 16 ги повлекоа или ги суспендираа своите цели.

Овој месец, Волмарт одби да ја објави својата квартална прогноза за профитот и објави зголемување на цените, што предизвика критики од Трамп.
Волво Карс, еден од европските производители на автомобили најизложени на американските царини, ја повлече својата прогноза за заработка за следните две години, а Јунајтед Ерлајнс издаде две различни прогнози, нагласувајќи дека е невозможно да се предвиди макро-окружувањето оваа година.

Трамп тврдеше дека царините ќе го намалат трговскиот дефицит на САД и ќе ги охрабрат компаниите да се преселат во САД, а воедно ќе ги принудат некои земји, како што е Мексико, да го спречат протокот на нелегални имигранти и дрога во САД.