Ова е спасениот војник од пламените јазици кај Подареш – евакуирани и други 8 војници, возила и булдожер
Во исклучително ризична и прецизно координирана спасувачка акција, хеликоптерските екипи на Министерството за внатрешни работи денеска успешно евакуираа девет припадници на Армијата на Република Северна Македонија, кои беа опколени од пламените јазици кај Подареш, меѓу кои и професионалниот војник Симе Николов, кој претрпел повреда додека се борел со пожарот.
Директорот на Национални шуми, Кире Михаилов истакна дека во акцијата биле вклучени два хеликоптери – BELL 412 и BELL 212 – при што едниот направил безбеден коридор со прецизни фрлања вода, а другиот се спуштил и ги извлекол заробените војници, како и едно возило „пинцгауер“, една „лада нива“ и булдожер кој бил ангажиран во гаснењето.
Повредениот Николов бил веднаш пренесен од Брзата помош од Радовиш до штипската болница, каде му била укажана итна медицинска помош. Семејството, колегите и јавноста упатуваат голема благодарност до сите служби вклучени во спасувањето – од хеликоптерските екипи и итната медицинска помош, до здравствените работници и припадниците на Армијата и полицијата кои неуморно се борат со огнената закана во изминатите денови.
Овој настан уште еднаш ја потврдува важноста на пожртвуваноста, солидарноста и координацијата на институциите во заштитата на човечки животи и природата на Македонија.
