„ОСТАНЕТЕ БЕЗБЕДНИ И ЧУВАЈТЕ НЀ БЕЗБЕДНИ“ Руте со поддршка за македонските сили
Генералниот секретар на НАТО, Марк Руте, денеска од касарната Илинден во Скопје порача дека е од клучно значење сите 32 сојузнички држави – меѓу кои и Северна Македонија – да дејствуваат заедно за да ја гарантираат безбедноста на територијата на Алијансата.
Обраќајќи им се на припадниците на Лесната пешадиска баталјонска група, Руте истакна дека е импресиониран од ангажманот на земјата како членка на НАТО од 2020 година. Тој го нагласи придонесот на македонските сили во копнените операции, поддршката за Украина и посветеноста на одбраната на секој дел од територијата на Алијансата.
– Навистина ми е чест што сум овде. Ви посакувам сè најдобро. Останете безбедни, и чувајте нè безбедни – порача Руте на крајот од обраќањето.
На настанот, министерот за одбрана Владо Мисајловски и началникот на Генералштабот генерал-мајор Сашко Лафчиски му врачија Големи плакети на Армијата на генералниот секретар на НАТО.
Ова е прва посета на Руте на Скопје во својство на генерален секретар на НАТО. Тој претходно престојуваше во земјава во ноември 2021 година како премиер на Холандија.
.
