Османи предупредува: Српскиот капитал продира и во банкарскиот сектор во земјава
Поранешниот Министер за надворешни работи, Бујар Османи и актуелен кандидат за градоначалник во општина Чаир предупреди дека влијанието на таканаречениот „Српски свет“ добива сè поопиплива форма во земјава. Во објава на „Фејсбук“, тој наведе дека по влезот на Српски Телеком, српскиот капитал сега се насочува и кон банкарскиот сектор.
Според Османи, во завршна фаза на одобрување од Народната банка е „Алта банка“, која планира да го преземе контролниот пакет акции на Стопанска банка АД Битола. Тој посочи дека сопственик на „Алта банка“ е контроверзниот бизнисмен Давор Маќура, кој, како што вели, е тесно поврзан со Милан Радоичиќ – организаторот на терористичкиот напад во Бањска, Косово.
„Тивко, ‘Српскиот свет’ станува синоним за оваа влада“, напиша Османи, алудирајќи на опасноста од засилено српско политичко и економско влијание во државата.
