Општината го откажа, Мерко бил зафатен – прв пат по 23 години не се одбележа Денот на Охридското езеро

Доцна вчера откако јавноста беше запознаена дека градоначалникот на Општина Струга, Рамиз Мерко е ставен на црната листа на САД, од неговиот кабинет е испратен допис до сите поканети на прославата „Денот на езерото“ дека истата се откажува.

Откажувањето според општината, е бидејќи градоначалникот Мерко има неодложни обврски.

Инаку, ова е прв пат после 23 години да не се одбележи Денот на Охридското езеро, акција која има за цел да ја подигне свеста за потребата од заштита на Охридското Езеро.

Трите езерски општини Охрид, Струга и Поградец во 2000 година потпишаа декларација за заштита на Езерото и на 21 јуни (секоја година) со различни активности, најизменично го одбележуваат Денот на Охридското Езеро.

Од кабинетот велат и дека дополнително ќе се произнесат за одлуката на САД со која тој се најде на црната листа како неподобен за влез во САД поради неговата вклученост во значајна корупција.