ОКТА ќе исплати 3 милиони евра дивиденда! Во Македонија остануваат повеќе од 400.000 евра
Најголемиот поединечен акционер ќе наплати 85,6 отсто од нето дивидендата. УЈП ќе наплати околу 300.000 евра за данок, а домашните акционери физички лица (повеќе од 900 н.з.) ќе поделат околу 107.000 евра. Нето дивидендата ќе биде 216 денари по акција
ОКТА, најголемата македонска компанијата за трговија на големо со нафтени деривати и поранешна рафинерија е подготвена да подели 2,97 милиони евра бруто дивиденда. Предлогот е објавен на веб страницата на Македонската берза во форма на предлог одлука за претстојното акционерско собрание што треба да се одржи на 29 мај годинава.
Предлогот предвидува бруто дивиденда во износ од 240 денари по акција односно по одбитокот на данокот нето дивидендата би била 216 денари за акција. Покрај акционерите дел од парите, поточно речиси 300.000 евра ќе ги добие централниот буџет откако УЈП ќе го наплати данокот (персоналец или данок на задршка за правни лица).
ОКТА ќе исплати дивиденда во нето износ од 2,67 милиони евра. Од тоа во Грција на сметката на доминантниот акционер – грчката државна нафтена компанија Е.Л.П.Е.Т ќе бидат пласирани околу 2,5 милиони евра.
Околу 107.000 евра ќе поделат нешто повеќе од 900 домашни физички лица – мали акционери кои не ги продадоа своите акции во оваа компанија. Тие контролираат 4 отсто од акциите во ОКТА. Е.Л.П.Е.Т Балканите Петролеум контролира 85,6 отсто од акциите, а 10 отсто се во сопствен откуп на скопска ОКТА. Согласно актуелната правна регулатива што ја регулира оваа област сопствените акции немаат право на глас на собрание ниту носат право на дивиденда.
Само за потсетување по откупот на сите акции на вториот најголем акционер „Пуцко Петрол“ ОКТА до октомври откупуваше акции од сите мали акционери по фер цена која изнесуваше 90 евра за секоја акција.
ОКТА претходната година не исплати дивиденда. Според официјалните податоци оваа компанија последен пат исплати дивиденда од добивката за 2022 година и тоа во бруто износ од 218 денари за акција.
Во однос на последната пазарна цена на таа акција дивидендниот принос е 4 отсто.
Дивидендата ќе биде исплатена на 29 јули, а право на дивиденда има секој акционер што ќе биде евидентиран во книгата на акционери на 26 јуни годинава.
Р.Ф.
