Одбојкарите се преселија во Кавадарци – ќе тестираат со Израел и Јапонија!
Жолто-црвените утре и в недела ќе ги одмерат силите со Израел, додека в петок ќе се сретнат со Јапонија, која, пак, в сабота ќе се пресмета со Израелците за комплетирање на одбојкарскиот празник во Тиквешијата. За избраниците на селекторот Јошко Миленковски ова ќе биде одлична можност за проверка на моменталните можности, односно за исправање на грешките покажани на контролниот дуел против Романија во Скопје.
По средбите во Кавадарци следува враќање во Скопје и уште два натпревара со Јапонија, овој пат во „Борис Трајковски“. Одбојкарите потоа ќе настапат на традиционалниот меморијален турнир „Чајка“ (18-20 август), каде што ќе ја провериме формата со Грција и со Египет, што же бидат последни натпревари за составот на Миленкоски пред првиот настап на третото ЕП по ред за нашата селекција.
Македонија во групата во Скопје ќе игра против Данска на 30 август, со Црна Гора на 2 септември, со Полска на трети, со Холандија на петти и со Чешка на шести септември, со нескриена амбиција првпат да се пласираме во осминафиналето. Таму ќе се најдат по четири селекции во групите во Македонија, Израел, Италија и во Бугарија.