Од понеделник инспекции низ градинките
Комисијата за заразни болести препорача децата коишто не ги примиле редовно вакцините „дитепер“ да не одат во градинка.
Изутринава екипата на МТВ направи обиколка во неколку градинки низ главниот град. Родителите велат дека кога ги запишувале децата го доставиле вакциналниот картон, а деновиве никој не побарал од нив повторно да го донесат.
Сепак, попладнево кај некои родители стигнале пораки. Поради ажурирање на податоците за вакциналниот статус, од понеделник потребно е да донесат фотокопија од картон за имунизација или медицинска потврда. Директорите на градинките велат дека ги следат препораките на Комисијата за заразни болести.
Од Министерството за труд и социјална политика вчера најавија дека инспекциски служби ќе проверуваат по градинките дали децата се вакцинирани со „дитепер“ за да се спречи ширењето на епидемијата. И во закон стои дека децата коишто немаат примено одредена вакцина не ќе можат да бидат дел од системот на детска заштита, истакна министерот Велковски.
Ана Јосифоска-Тодоровска
