„НОВАРТИС“ ГО КУПУВА ГЕРМАНСКИОТ ПРОИЗВОДИТЕЛ НА ЛЕКОВИ ПРОТИВ РАК – аквизиција тешка 2,7 милијарди евра
Швајцарската фармацевтска компанија Новартис објави дека ја презема германската фармацевтска компанија MorphoSys, која развива иновативни лекови во областа на онкологијата.
Со аквизицијата вредна 2,7 милијарди евра, Novartis ќе го зајакне развојот на новата генерација методи за лекување на ракот, се вели во соопштението.
Договорот едногласно го одобрија управните одбори на двете компании, а Новартис за преземањето ќе плати 68 евра по акција.
Преземањето сега мора да биде одобрено од акционерите и регулаторните органи, а се очекува да биде завршено во првата половина од годинава.
„Со планираното купување на MorphoSys, сакаме дополнително да го зајакнеме нашето водечко портфолио за онкологија и да ги зголемиме нашите способности и експертиза“, напиша членот на извршниот одбор на Novartis, Шрирам Арадхаје во објавувањето на плановите за аквизиција во понеделникот.
Во Новартис главно се заинтересирани за лекот пелабресиб, кој моментално се уште е во фаза на тестирање. Фармацевтскиот гигант го нарече „потенцијален лек од следната генерација“ за луѓе со миелофиброза, ретка форма на рак на крвта.
Novartis го намали персоналот и трошоците и го прекина својот бизнис со генерички Sandoz минатата година. Во тоа време, оттаму рекоа дека нивната стратегија за спојување била фокусирана на зделки вредни помалку од 5 милијарди долари.
Извор: Бонитет.ком
