Од 1 јули почнува првото намалување на царинските тарифи за 50 отсто
Од 1 јули 2025 година ќе стартува првото намалување на царинските тарифи за 50 отсто за над 70 тарифни броеви, најави министерката за финансии Гордана Димитриеска Кочоска. Оваа мерка е дел од процесот на усогласување на домашната царинска политика со европските стандарди, а целта е да се создадат подобри услови за домашните компании и да се поттикне производството и извозот.
Како што посочи министерката на денешната средба со претседателот на Стопанската комора, Бранко Азески, намалувањето ќе се одвива во две фази, сè до целосно усогласување со тарифите што важат во Европската Унија.
– Првото намалување ќе се случи на 1 јули, а второто ќе следи по дополнително усогласување. Ова ќе биде силен поттик за компаниите, бидејќи ќе им се овозможат пофер услови за работа и конкуренција на европскиот пазар – рече Димитриеска Кочоска.
Според неа, ова е важен чекор кон поддршка на стопанството и унапредување на извозниот потенцијал на државата. Царинскиот закон за тарифите веќе е во владина процедура и се очекува наскоро да биде усвоен.
