Обвинителството ќе ја обжали ослободителната пресуда за таткото на Вања Ѓорчевска
Основното јавно обвинителство најави дека ќе поднесе жалба на ослободителната пресуда за Александар Ѓорчевски, таткото на убиената Вања Ѓорчевска. Тој беше обвинет дека им помогнал на сторителите со давање информации за движењето на неговата ќерка, што довело до нејзиното грабнување.
Обвинителката Ана Стојковиќ Димитриевска изјави дека, иако немале доволно цврсти докази, останува фактот дека само родителот знаел дека Вања ќе оди сама на училиште. Таа потсети дека двајца од обвинетите во првичните искази тврделе дека информацијата ја добиле од таткото преку Љупчо Палевски, но подоцна ги сменија изјавите.
И додека обвинителството најавува жалба, Кривичниот суд денеска изрече доживотни затворски казни за Љупчо Палевски, Боре Видевски, Влатко Кешишев и Велибор Манев. Четворицата се прогласени за виновни за киднапирањето и бруталното убиство на Вања Ѓорчевска и Панче Жежовски.
Александар Ѓорчевски, таткото на Вања, беше ослободен од обвинението за помагање во грабнувањето.
