ОБВИНИТЕЛСТВОТО БАРА ДА СЕ УКИНЕ ОСЛОБОДИТЕЛНАТА ПРЕСУДА ЗА ЃОРЧЕВСКИ Бранителот Туфегџиќ потсети дека ЈО пред Судот призна дека против Александар немаат докази
Јавното обвинителство поднесе жалба до Апелацискиот суд за ослободителната пресуда на Александар Ѓорчевски, татко на убиената Вања Ѓорчевска, на последниот ден од рокот за жалба. Пресудата за Ѓорчевски и за убијците на Вања Кривичниот суд ја изрече на 25 јуни 2025 година.
Бранителот на Ѓорчевски, Владимир Туфегџиќ вели дека ја очекувал жалбата и ќе бара јавна седница на жалбениот совет.
– За ослободителната пресуда за Александар Ѓорчевски Јавното обвинителство, според мене очекувано, денеска пред крај на работното време, во последниот ден од жалбените рокови, поднесе жалба со која бара укинување на пресудата за Александар. Ќе доставам одговор на жалбата, со кој ќе барам јавна седница на жалбениот совет на Апелациониот суд. Очекувам Судот во жалбената постапка да ја потврди ослободителната пресуда, токму врз основа на наводите на застапникот на обвинението во завршен збор, во кој кажа цитирам „ако нè прашате дали имаме докази против Александар, немаме“ – вели Туфегџиќ за Плусинфо.
За убиствата од користољубие на 14-годишната Вања Ѓорчевска од Скопје и на 74-годишниот Панче Жежовски од Велес на доживотен затвор се осудени Љупчо Палевски Палчо, Велибор Манев, Боре Видевски и Влатко Кешишев, од партијата Десна. Четворицата се осудени и за грабнување на Ѓорчевска, а Кривичниот суд ги ослободи од обвинението за грабнување на Жежовски, затоа што Обвинителството не го докажа тоа дело.
Жежовски беше пријавен за исчезнат на 24 ноември 2023 година, а Ѓорчевска на 27 ноември 2023 година. Двајцата беа пронајдени мртви на 3 декември 2023 година, закопани во околината на Велес и на Скопје, а по кажувања на осудените Манев и Кешишев.
Таткото на Вања беше обвинет за помагање во грабнувањето на неговата ќерка, а судијата Ивица Стефановски го ослободи затоа што јавните обвинителки Жаклина Јосифовска Крстевска и Ана Стојковиќ Димитриевска не го докажаа обвинението. По пресудата тие најавија жалба.
Бранителите на осудените Палевски, Манев, Видевски и Кешишев, исто така, најавија жалба на изречените казни доживотен затвор.
.
