Обрасци за пасоши има само за итни постапки, министрите со меѓусебни обвинувања

Саботажа нема, обрасци за пасоши наскоро ќе пристигнат во поголема количина. Дополнителниот заменик министер за внатрешни работи Митко Бојмацалиев вели дека во изминатиот период се пристигнати вкупно 70 илјади, а поголема пратка ќе се испорача во јуни.

Со пристигнатите обрасци ќе се печатат пасоши на оние кои се сликале по итна постапка или приложиле медицинска потврда. Тоа значи дека оние сликани во редовна, ќе почекаат уште малку.

Случајот веќе го разгледува и Обвинителството кое постапува по пријава на опозицијата за издавање на документи на кои им завршува рокот.

„Кривичната пријава е примена и приклучена кон претходен предмет по поднесена друга кривична пријава со исти наводи. Во предметот веќе се побарани информации од надлежни институции и обвинителството во целост ќе ги провери наводите“, велат од Обвинителството.

Откако и денеска не беше оперативна веб-станицата на којашто граѓаните ќе може да проверат дали им се готови документите, од МВР за јавниот сервис велат дека службите работат за да ја стават во функција. Потврдуваат и дека нема застој во информирањето на граѓаните по пат на СМС пораки дека исправите им се изработени. Пасоши со новото уставно име досега добиле 1.300.000 граѓани.

Анита Димитријевска – Велковска